الغول الأسود

. الغول الأسود

كنت كالس هاني ماعليا مابيا
كَنعيط على الله فالصباح
و نرجع لداري فالعشية
يدوز النهار ساهل
بحال الصيف بحال الشتوية
القوت ما تضربلو حساب
مرة عليك ومرة عليا
خبز وزيتون بيصارة بالكمون
و بويضة مقلية
اللعبوا مع الدراري
نشرشرو أتاي فالصينية
نشوفوا فيلم
نديرو لمساخن والنعسو بالنية

و فيوم من يام الدنيا
جا الغُول يفرس الضحية
طلق البراح يقول: لي بغا الفلوس
يحضر فالحين وبلا تزكية
شاع الخبار بين العادي و البادي
فكل مكان من المدينة والبادية
العباد فرحات وقالت :
هدا خير بلا نوِية

حتى أنا بحال الناس
تقيدت فالكناش وعطيتهم السمية
و بين ليلة ونهار
عطاوني الفلوس ومعاها هدية
رجعت لداري فرحان
وشريت لولدي صباط ولبنتي سبنية
ولمولات الدار شربيل
قميص ومنصورية
حتى لهنا الأمور بخير
وعَاجْبَني الدنيا
بالنهار ضاحكين
و بالليل شاخدين فوق النَموسِية

دازت ليام بحال الريح
تقطع الصباط وتحرقات المنصورية
الراس عامر هُموم
والغول باغي حقو فالشهرية
سولت لصحاب والحباب
واش كاين شي حل لهاد القضية؟
لسوء الحظ…
لقيت جيراني كلهم ضحية
فات الفوت ومابقا لاحوت
لازيتون لا مروزية
الغول دخل لدار
حرق الكٌاميلة وتقب الناموسية
هدي حكايتي مع السلف والربا بالعربية
الكريدي بالفرنسية في صورة حضارية

جٌُوماريط القهاوايجي
واخة عندك الفالي دهبية
لي فرط يكرط…
يخسر حياتو ويفقد الحرية
لي مافهمش بالعربية
يترجمها لماما الفرنسية

بقلم ✍️
علاء العرجاني
عدسة Yassine Benmoussa